يا دنيا

ولا همني اللي يشغلك
يا دنيا ماعدت اشتقتلك
مش فارقه بكره حامل إيه 
شايلي إيه وجايبه ليه 
ولا حتى حلوه نفسي فيه 
فارقيني لما احنلك....

فكره

تطوف بخاطري فكره 
لهـا زمن تشاغلني
لما الدهر الغريب لنا 
لما العيش المرير بنا
نعيش بزيف واقعنا 
ونرضى بكل مامعنا 
ونبقي في جيبنا وجها
لنخفي ماقد يراودنا...
تلاشى الخوف من حولي
فلم اصبح باحساسي
تيبس دمي في جوفي
فلا يسري لأية روح
ولا سرا أعاد ابوح
لم يبقا الطموح لنا 
فتاتا صار داخلنا
هرمت ولم اجد سببا
لامحي سواد مقتبلي...

جوه سجون فكري

جوه سجون فكري
أفكاري محبوسه
متكبله..متقتله
ماهيش ملموسه
محجوب تشوف النور 
ملفوف عليها بسور
جنتها جوه قبور
م البرد مقروصه
شباك صغير واحد
ف اخر الزنزانه
تحبيلوا أفكاري 
تحتوا الجثث مليانه
كذا فكره حاولت تظهر
قالوا بالنضال هتعبر 
حريتي فكره..مش منظر ولامظهر 
جوه السجون شقيانه........

أنا المصري

الكلمات دي كنت كتبها من فتره قريبه في لحظه محاكاة للواقع...بحاول اوصف فيها الإنسان المصري الأصيل بقدر المستطاع......

أنا المصري 
أنا المصري الملبوس
ابن الشعب المنحوس 
أنا العفريت اللي اتحبس جوه الفانوس 
ومطلعشي..
وانا اللي دايسه على رقبتي الظروف 
متعتقشي..
وأنا الحاير انا الداير 
وانا الفرحان لابسط شيء
بكون زعلان عشان عادي
ومتعود أحس بضيق
حياتي تجريدها دواير
أنا الأزمه
وساعات كتيييير مليش لزمه
أنا الزنقه وانا الخنقه 
حمار الشغل ليل ونهار
طالع ديني عشان القى
حلال اكله غير الصبار
انا اللي علقت في الزحمه
وأنا المكبوت..أنا المسلوت
بكون راضي لكن مفحوت
عشان مستور انا المهجور
انا المتعري وسط النور 
وأنا التعبان أنا الشقيان
أنا الإنسان.....المصري
أنا المصري....

"٢٨ يناير يوم الامجاد في ذكري نكاح الاوغاد"

النهارده هو يوم 28 يناير :) يجمع هذا اليوم العديد من المشاعر المتقلبه من كافة أنواع وطبقات الشعب, أنا يكفيني أتكلم عن المبتسمين وعاشقي هذا اليوم وعن ايجابياته لا سلبياته, يوم الغضب الاكبر في ثورة المصريين, يوم التعبير عن كل ماكان يكن في صدورنا وصدور الغائبين عن الحريه, اليوم اللي كل الناس نزلت قصاد الوحش الأكبر و البعبع وشبح الدوله اللي محدش كان بيقف قدامه ومحدش كان يقدر يتكلم عنه "النظام" واللي كان يتكلم كان بيروح في خبر كان أو زي ما كانوا بيقولوا هتروح ورى الشمس, وقفوا قدامه وقفه جديه من بعد 25 يناير وقفة اسد يزأر غضبا من حاله وحال بلده المتدهورة المنهوبه, وإعتراضا على استمرار حالهم على هذا المنوال و زي ماقالي واحد قبل كده معبرا بـ "كفااايه..إن احنا زهقنا ومش عايزين ناخد على قفانا تاني".

 اد إيه اليوم ده كان وسيظل فخرا لكل حاضريه في كل الميادين المصريه وخاصة ميدان التحرير وضواحيه, ميدان الأبطال الرجاله بجد, مهما اتكلمت عن اليوم ده مش هبطل كلام لانه بالنسبالي كان هو ده يوم الثوره وروحها الحقيقيه.

ختاما نشكر وندعوا بالرحمه لكل اخوتنا, شهدائنا الذين ذهبوا وتركوا لنا الامل والبسمه لبسالتهم, ونعتذر منهم ايضا لتقصيرنا في حقوقهم وحق البلد وحقوق الغلابه اللي ماتوا عشانها و بتمنى يسامحونا..نشكر المستمرين في النضال من اجل البلد واقامتها, واللي لسه مزهقوش أو سلموا دماغهم للواقع المرير.

النهارده زي ما الناس قالت "٢٨ يناير يوم الامجاد في ذكري نكاح الاوغاد".

شكر واجب

في بداية عودتي للتدوين احب اشكر من كان له الفضل لذلك واولهم اصدقائي ومعارفي اللي شجعوني أرجع أكتب بعد ما لغيت تماما أول مدونه لي لبعض المشاكل وقلة الفهم مني لحاجات, وثانيا اشكر المدونه الرائعه ميرنا الهلباوي ذات الكتابات الملهمه اللي فعلا كتاباتها كانت سبب كبير إني أرجع للتدوين :) ..شكرا ليكم بجد. وأتمنى افضل عند حسن ظنكم وظن الجميع.
من الرائع ان يكون هناك أشخاص يدفعوك للإتجاه الإيجابي فكريا..حتى إن لم تكن تعرفهم أو تجمعكم علاقه..المهم الوصله :)