جوه طريق الحزن بتمشي ؟!

جوه طريق الحزن بتمشي ؟!
إعكس سيرك متكملش.. 
ارجع تاني لأصل المفرق
غيرك ناضل مستسملش..
متكسلش تبص بعيد 
ربك خالقك يومك عيد 
ماتطفيش الشمعة تأييد 
نور شبابك ميضلمش.... :)

أنا ونقط

انقسام...
انفصام...
تشتت بين مشاعري وأفكاري
أنا ونفسي بنتعارك مين اللي يرفع الصاري !
مين الأصلح يكون قبطان ؟!
لمركبة عمري الجاري
مين القادر ميهربش ؟!
قصاد غدر الزمن ساري
أنا ونفسي !

إلتحام...
صراع فكري وفكر الكون..
أنا والناس وناس تانيه
وأي فكره بتبدأ في ثانيه
لا أنا صح ولا انتم غلط
في ناس عايش في مخها الزلط !
والفكره للمصلحه فانيه
مؤمن بأفكاري واللي يكون هيكون
فكري وفكر الكون !..

انسجام..
قليل قوي لما أكون مرتاح
أنا وقلبي..ومتصافيين
بنتعاتب ومش قافشين
ولا عاجزين..ولا واقفين
على أعتاب قلوب تانيه
 بنتحايل..ونتمايل
ولا حابب يبات قلبي يقولي من فلان شايل
بحاول إني أعيش عادي ومش فارقه
تكون احزان, تكون أفراح
مهم إني أعيش مرتاح
أنا وقلبي...

استفهام..
أنا وبس..
كل اللي فات ده كلام
وأنا نفسي كلامي غير
هوايتي أسمع للغير
أكتب حكاوي الناس
اوصف ظروف صعبه
واضح يكون ظاهري
غامض قوي لجوه
وبابي ليه 100 ترباس..
كاتب كتير جوابات
ببعتها دون عنوان
مش فارقه من يقرا
ولا فارقه إيه هيبان
كل اللي هاممني إن الجواب يوصل
لشخص محتاجه
ويقدر يلاقي سطر يهز أشواقه
ويكون بداية وصل..
ليلي عزيز الأصل..معايا أنا و بس..

ألغام..
مستقبلي المجهول..أنا ونقط كتييير..علامات تعجب
عامل طموحي بالورق مركب
طافي على البحر المجنون..
موجه عاليه وموجه واطيه
وموج كتيير حده مسنون..
مش خايف من مستقبلي
لكن عامل حساب الغدر
في ناس تشوف إن النقط دي ستر
ناس تانيه توصلها
وناس تالته تلونها
وانا يكشفهالي نور البدر..
وعن رؤيتي مسئول..
أنا ونقط..مستقبلي المجهول....