عارفه !

عارفه !

برغم إنك كئيبه

وكئابتك متأصلة فيكي

والخوف م الجي اللي محاوطك

واللي مساعدك و مخليكي

تفتكري إنك مهتتحبيش !

أو يوم ما هتتحبي ف ثانيه

تعرفي تمشي و متتخضيش..

معاليكي اللي انتي متعرفيهوش

إن سوادك ده محليكي

وسواد الليل تلمعله نجوم

و سوادك إنتي بيغنيكي

تلمعله عيون..

مش شرط أكون شايف قلبك

علشان اعرف احددله اللون..

روحك تتكلم عن روحك

بطلي بقا تقليب ف جروحك

والعزله اللي انتي معاشراها

إنتي اللي بجد مآنساها

مش هي اللي بتشفي الماضي..

كنت بقول، انه برغم إنك..

كل الحجات اللي فاتت

و كلامي الفاضي

نفسك حلوه بشكلها

وبشعرها الكيرلي - أظن -

ولبسها

و تعقيداتها و كلكعتها

وكل ظنونها و متاهاتها

الميكس جميل..

فأحبي نفسك يا صبية

ده الحب خصوصا لو نفسك

له سحر الليل...

جمَّعي نفسك ف حضني
لَمْلِمي كل الشَتَات..
وامنعي كل الحواجز
اللّي بينا من سكات..
اغفري ليا الخَطَايا
وافتحي باب العَطَايا
واشغليني م البداية
ياللي صحّيتي اللي مات...

انا المصري..

أنا المصري
أنا المصري الملبوس
ابن الشعب المنحوس
أنا العفريت اللي اتحبس جوه الفانوس
ومطلعشي..
وانا اللي دايسه على رقبتي الظروف
متعتقشي..
وأنا الحاير
انا الداير
وانا الفرحان لابسط شيء
بكون زعلان عشان عادي
ومتعود أحس بضيق
حياتي تجريدها دواير..
أنا الأزمه..
وساعات كتيييير مليش لزمه
أنا الزنقه وانا الخنقه
حمار الشغل ليل ونهار
طالع ديني عشان القى
حلال اكله غير الصبار..
انا اللي علقت في الزحمه
وأنا المكبوت..
أنا المسلوت
بكون راضي لكن مفحوت
عشان مستور..
انا المهجور
انا المتعري وسط النور
وأنا التعبان
أنا الشقيان
أنا الإنسان.....المصري
أنا المصري..