كنت قد اخذت عهدا على نفسي بـأن لا اتألم بشده أو تراق دمعتي عندما أرى منظرا مؤلما أو لقطة قد شاهدت مثلها من قبل في احداث هذا البلد المأساويه...كنت قد اعتقدت انه لم يعد يوجد بها مايستحق المعناه والألم بعد ذلك..كنت قد تأكدت انه لا يوجد سوى تحليلين لهذه الحياة التي يعيشها الشعب, أما ان نظل تحت حكم المرسي لأنه رئيس منتخب ووافق عليه معظم الشعب ومعتقد أننا في ظل وظلال حكم الدوله الإسلاميه العادله المراعيه لحقوق وواجبات الناس مع العلم ان اسلامية اتجوزت وسافرت بره البلد وبتتفرج علينا من هناك فهذا في حد ذاته هو غياب العقل عن التفكير والوعي و تبوء كل المحاولات في تغيره إلى الفشل فيستحق الشعب ان يعيش في ظل هذا النظام المتأسلم المنافق تاجر الدين بائع الفكره, وأما أن يعلم الناس قذاره ودنو هذا الفكر الإسلامي الذي يطبق وانه ليس اسلامي من الأصل وإما يكون أنبغ ان يسمى متأسلم أو متسستم أو زائف أو ذو الحدين وكل الكلام الحلو ده ويصر على بقاءه لكي تسير عجلة النمو والاقتصاد في بلدنا الحبيب وهنا يكون حقا على هذا الشعب ان يهان ويمتهن لخوفه على اقتصاده ولقمة العيش وبعده عن الحريه ومعنى ان يعيش الإنسان بكرامه, فهذا يترتب على ذاك سيدي المواطن.
بعد ان رأيت من قبل ورأينا اختي واخت الكثير من الشباب الوطني المكافح اللي طلع دين أمه من اجلكم سيداتي وسادتي واسف على اللفظ ولكن هذه افصح كلمه داخلي لاعبر عن الشباب اللي طفح الكوت من أجل ان يعيش الشعب حياة شريفه كريمه حره خاليه من اخطاء أو هفوات النظام القامع للفكره و كابت الحرية والتعبير ان تحدث لنستطيع ان نعيش, اسف, ان تعيشوا انتم حياة كريمة اكثر من ان يعيشوا هم لأن معظمهم لديه القدره على السفر خارج البلد وعيش حياة زهيده خاليه من وجع الدماغ من الآخر, ومنهم من يملك بالفعل هنا وظيفة بمرتب جيد يكفيه ويمكنه من اعاله اسره ومنهم من يملك المال بدون العمل اصلا لكنهم وهبوا نفسهم لأجل حرية ونضافة هذا البلد, بلدهم وبلدكم لو فاهمين يعني إيه بلدكم وإزاي تحافظوا وتقوموا بلدكم ايها الساده..
المهم بعد ان رأينا منظر اختنا الدكتوره العفيفه اللي اتسحلت في ميدان التحرير واتجردت من ملابسها تلبية لرغبه عساكر لا دين لها عشان ليه وإزاي تنزل التحرير تساعد الناس ليه وإزاي يا بنت......و يا بنت.... ويابنت... تنزلي الميدان تقولي رأيك و......تكاثرت الاقاويل والكلمات والمقالات والمقولات عنها كل بحسب فكره وعقليته, تأثرنا وثارت دمائنا لاختنا الدكتوره وقلنا لمن قال اترضاه لاختك ما قاله لنا وليس هناك أي عذر يعتذر به لها أو لاهلها ومحبيها سوى العقاب الشديد للمسئولين عن مافعل بها والمسئولين عن هؤلاء الأوغاد غير الآدمين ولم يكن هناك رجعة عن هذا, طبعا كلنا نعرف عن الانقلاب اللي حصل في البلد والوقفات ساعتها اللي حصلت في مصر وبره مصر نصرة ليها وتطهيرا لصورتها مع انها كانت تستحق اكثر من ذلك بكثير في رأيي ونظر الكثيرين غيري, وذلك ايضا لم يكن ليكفي لها واسف لذلك اختي الكريمه فانتي تاج على رؤوسنا غصب عن انوف الجميع وستظلي ماحيينا..
مكانش حد يتمنى بعد كده انه يشوف حاجه زي دي تاني ومكناش نتوقع حدوث ذلك بعد ان فتح لنا المرسي صدره في الميدان معلنا انه لن يحدث في عهده مرة اخرى ( كل اللي قاله ), وزاد يقين المعظم به كرئيس يخاف على بلده وبلا بلا بلا..
وحدث كل ما قال بأنه لا ولم لجلج وكل كلمة نفي ممكنه عن الكلام المحظور حدوثه, - بإختصار - وصولا إلى هذا اليوم 1/2/2013 الأول من فبريار لسنه 2013 "جمعة الخلاص"....
نزلت التحرير اشوف احداث الجمعة واجتمع مع اصدقائي في البورصه -وسط البلد- بعد احداث الاعتقال اللولبيه التي حدث خلال اليومين الماضيين من اعتقال مفاجئ وبدون سبب من المخبرين للناس وهي مروحه بيتها في أمان الله وضربهم واهانتهم وكان مابين المعتقلين بعض الاصدقاء المسالمين وبشده وما زال منهم من في الحبس...كل ده بيحصل وماشيه بس ده موضوع يستحق الإهتمام وايضاحه وحده, المهم, قاعدين على القهوه فجأه صوت صويت وناس بتقول : الحق الحق بص على التلفزيون بسرعه !! صمت رهيب حل على كل أصحاب النفوس الرحيمه واللي عندهم دم, يليه صوت عياط وآهات استفسار عن هذا المنظر البشع ! واسف لوصف المنظر لكني مجبر على ذلك ليستريح ضميري لما أكتبه وياريت نستخدم مخيلتنا شويه في الكلمتين الجايين دول "رجاء خاص",,
بظبط كالتالي راجل كبير عريان تماما أو بلبوص بيتسحب من رجله وبيداس بجزم العساكر وبيتضرب على كل انحاء جسمه وبيتلطش على الأرض وهو مزنوق, و بيترجاهم يسيبوه, في تخيلي انه كان بيقولهم : "حرام عليكم...حرام عليكم سيبوني أنا بموووووت..طيب البرد طيب البس حاجه واعملوا اللي انتوا عايزينه...ااااااااه...حرام عليك يا بييه....ليه كده يا باشا حراام عليك مش قادر...مش قاااااااادر أنا غلبان أنا بموت...اااااااااااااه"...........
حدث ذلك المنظر المقزز في محيط الاتحاديه من عساكر الأمن المركزي, عساكر الداخليه الطاهره, العساكر اللي عندها قلب بس قلب مصفح زي عربياتهم اللي بيركبوها ويحتموا فيها من شرار الثوار بعد مايموتهم بريحة الغاز المميت, حدث ذلك وفتحت بوابة غضب غير عاديه من كل اللي شافوا المنظر البشع ده المنظر الغير آدمي, المنظر اللي فور دم جميع المتفرجين الكرام اللي تخيلوا نفسهم مكان الراجل الغلبان ده, أو حد من اهلهم أو صحابهم مكانه كان هيكون إيه احساسهم غير كده !! وهيكون إيه رد فعله على اللي فعلوا هذه الفعله الشنعاء...على رأي اللي كانوا قاعدين : ده في اسرائيل محدش عمل كده في الفلسطنيين ولو كان بيحب يعمل حاجه كان بيقتله ويريحه أو يحبسوه في السجن بهدوم كبني ادم مش عريان في الشارع في عز البرد على الاسفلت يهان ويمتهن وينتهك عرضه !!!
مين اللي عنده القلب يعمل كده ؟! مين اللي عنده القدره يشوف كده ويسكت ؟! مين اللي يسمح يتعمل كده في اهله وعشيرته وشعبه يا ريس..يا مرسي يا دكتور ؟!!! مستني منا إيه لما يحصل كده في بلدنا لواحد من شعبنا حتى لو كان حرامي أو بلطجي ؟! تهون عليك نفسك ونفس الناس دي ؟! يهون على حد يشوف كلب بيتعذب في الشارع كده والسلام حتى لو بسبب ؟! احنا بني ادمين خلقنا باحساس يرافقنا وقلب نشعر به !وبعد كل ده لسه في اللي بيقولوا الناس دي تستاهل عشان متمرده وعايزها تولع !!!!!!!!!
إيه ؟؟؟! من انتم ؟؟! من انتم ومن ماذا خلقتم لتظلوا تدافعوا عن حكومه أو رئيس يحدث مثل هذا الحدث المأساوي لفرد واحد من شعبه تحت ظل حكمه ونفوذه ؟! والله, ولله العظيم وقسم احاسب عليه من ربي لو كنت أنا مسؤولا عن عدة أفراد وحدث مثل هذا لأحدهم لسكوتي وسماحي بحدوث ذلك له, لكنت سلمت نفسي قابلا اقصى أنواع العقوبات الجائزه علي وإن كانت الإعدام وإعدام مرتكبيه في ميدان عام تحت انظار كل الحضور للاعتبار والعبره, ومعرفة ماهو الإنسان وكيف يعيش بكرامة بعد ذلك !
هل تعتقد ان بعد كل ماقلته هذا يا ريس لسه ليك مكان وسطنا ؟! لسه إنت صح وهتشوحلنا بصباعك وتقول سأفعل وسأفعل بإسلوب التهديد إياه ؟! لسه وزير الداخليه مش هيتحاكم بعد القرف ده ؟! لسه الاخوان مكملين مسيرتهم في تجارة الدين ؟! لسه فاكر اننا هنسكت عليك وعلى نظام حكمك يا ريس أو يا مرسي بقى ماخلاص باينه ! لسه عندكوا ذرة شك في إن الكرسي اللي طمعتوا فيه يا اهله وعشيرته نفعكم وانتوا شايفين البلد بتولع وكل اللي فالحين فيه تدافعوا عن الرئيس وحكومته على النت وتكذبوا البوستات والمقالات والمنشورات عشان مصلحتكم ؟! إيه مزهقتوش بقى ؟!
مفروض يحصل أكتر من كده إيه ؟! إيه يعني اللي يحرك مشاعرك ومشاعرهم عشان تتحرك بإيجابيه وصح ؟! لحد ما الشعب كله يتعرالك ولا إيه يا رياسه ؟!
أنا بطالب بحق هذا الرجل من جميع القيادات في البلد, صغيرة كانت أو كبيره, يرجع حقه امام الناس كلها زي ما اتهان واتعرى امامهم جميعا ويحفظ حقه وحق اهله وهذا أقل مايمكن فعله لأجله ربنا يديله طولة العمر إن شاء الله وميكونش حصله حاجه من تحت ايد كلاب الداخليه, ويحاكم كل من قام بالتعرض له وكل المسئولين عنهم ابتداءا بالظباط يليه وزير الداخليه انتهاء بالرئيس محمد مرسي....
وكفايه بقى بجد..حرام بقى عليكم البلد وقعت أكتر ماكانت واقعه ! الشعب اتهان وطلع عين ابوه واللي خلفوه واللي بيتشددوله !! حرام لما اكون عندي 22 سنه وحاسس إني عاجز حتى عن إني أعيش شبابي لاني شايل جواية هم اسمه بلدي ومستقبلي وحياتي !! ده مش كفر وحرام وقلة قيمه لما أبقى ماشي في الشارع وانا راجل شحط خايف اتشد مرجعش لوالدتي واخواتي اللي محضرين العشا ومستنيني وانا راجعلهم شايل كيس اللبن والعيش ؟! حرام ده ولا مش حرام حد منكم يرد عليَّ ؟! حرام ولا مش حرام قلق أبويا اللي متغرب عشانا بره مصر عشان ناكل أكل نضيف وطالع عينه بعد عن اهله وعننا وكل 5 دقايق يكلمني يقولي حاسب على أمك واخواتك وخلي بالك منهم وخلي بالك من نفسك وبلاش تعمل كذا وكذا وكذا عشان البلد مش أمان, متخلمهش يتمرمطوا وراك أنت الرجل هناك مكاني !! إيه الحصار اللي عايشين فيه ده ؟! ولا رأي ولا حريه ولا أمان !!!!
كفايه بقى, كفايه قوي لحد كده يعني ! الموت أهون علينا من احساسنا بالعجز في بلدنا افهموا بقى...افهموا بقى عشان كده شكرا..كده مات الكلام.
* ده لينك الفيديو على صفحتي على الفيس بوك وايوه كاتب الكلام ده ومش خايف..اسف للإطاله مع إني مش حاسس إني قلت حاجه لسه تبرد ناري.........
المجد للثوره, الثوار, الكرامه والحريه والعداله الاجتماعيه.
http://www.facebook.com/omar.m.mustafa/posts/493798854012421?ref=notif¬if_t=like
